PEP GUARDIOLA: ‘BILA KOMBE MSIMU WA MANCHESTER CITY UMEFELI!’

PEP-TAJIPep Guardiola amekiri kuwa ikiwa kwenye Msimu wake huu wa kwanza na Manchester City utaisha bila kutwaa Kombe lolote basi utakuwa umefeli.

Akiwa na mafanikio makubwa kwenye Klabu za Barcelona na Bayern Munich, Guardiola alitegemewa kupata mafanikio makubwa alipotua City lakini matarajio ya kutwaa Ubingwa wa England yanafifia wakiwa nyuma ya Vinara wa Ligi Chelsea kwa Pointi 10 huku Mechi zimebaki 11.

Hata hivyo, Manchester City bado wamo kwenye FA Cup na UCl, UEFA CHAMPIONZ LIGI.

Guardiola ameeleza: “Kama sipati Kombe sitakuwa hapa muda mrefu! Bila Kombe hautakuwa Msimu mzuri! Nilijua hilo tangu Agosti. Kuwa Meneja kunategemea mafanikio!”

Guardiola ametoboa kuwa akiwa na Bayern hakutwaa UCL bali alitwaa Ligi mara 3 na hilo kuonekana ni maafa.

Ameeleza: “Nilitwaa Ubingwa wa Ligi mara 3 mfululizo, tulibeba Vikombe Viwili kati ya Vitatu na kufika Nusu Fainali na Fainali ya vingine na hayo kuonekana ni maafa!”

RIPOTI: ARSENAL YATENGA £60m KUMCHOTA MBADALA WA ALEXIS SANCHEZ!

ARSENAL-SANCHEZ-MKONOARSENAL wanatarajiwa kutoa Ofa ya Pauni Milioni 60 ili kumnunua Straika wa Lyon ya France Alexandre Lacazette baada ya kukata tamaa ya kuweza kumbakiza Alexis Sanchez kwa ajili ya Msimu ujao.
Mpaka sasa Fowadi wao kutoka Chile Sanchez bado hajakubali kusaini Mkataba mpya huku wa sasa ukiwa umebakiza Miezi 18 tu na Meneja wa Arsenal Arsene Wenger inadaiwa ashakata tamaa ya kuendelea kuwa nae.
Hilo limemfanya Wenger kutafuta mbadala wake na Lacazette yupo juu kabisa ya Listi ya walengwa wake.
Ripoti huko England na France zimedai Lyon itadai ilipwe si chini ya Pauni Milioni 50 na Dau halisi kufikia Pauni Milioni 60 ikutegemea vigezo zaidi vya mafanikio ya Mchezaji huyo.
Kabla Msimu huu wa sasa kuanza Arsenal walitoa Ofa ya Pauni Milioni 35 kumnunua Lacazette lakini ilikataliwa na Lyon na sasa Dau limepanda wakati pia Liverpool wakiripotiwa kumnyemelea.
Licha ya kuwafungia Lyon Bao 27 katika Mechi zao 31 Msimu huu Lyon wako tayari kumuuza Lacazette kwa Dau kubwa muafaka kwao.

CARRICK KUTUNUKIWA MECHI YA HESHIMA OLD TRAFFORD KWA UTUMISHI ULIOTUKUKA!

>WASHIRIKI VAN DER SAR, NEVILLE, RIO, SCHOLES, GIGGS DHIDI YA GERRARD, LAMPARD, OWEN!

MANUNITED-CARRICK-ABEBA-FACUPMichael Carrick ametunukiwa Mechi ya Heshima na Klabu yake Manchester United kwa Utumisha wake uliotukuka wa Miaka 11.

Kwa mujibu wa matakwa ya Carrick mwenyewe, ambae ndie Naibu Kepteni wa Man United, Fedha zote zitakazopatikana baada ya kutoa Matumizi zitagawiwa kwa Mifuko ya Hisani kama Msaada kupita Mfuko wake mwenyewe ulioanzishwa hivi karibuni uitwao Michael Carrick Foundation na kusajiliwa rasmi.

Miongoni mwa Sherehe za Siku hiyo Maalum, Jumapili Juni 4, ni Mechi kati ya Kombaini ya Manchester United ya Mwaka 2008 dhidi ya Timu ya Nyota wa Michael Carrick.

Kikosi cha Man United ambacho Wachezaje wake wamethibitisha kushiriki ni pamoja na Edwin van der Sar, Gary Neville, Rio Ferdinand, Paul Scholes na Ryan Giggs wakati Nyota wa Michael Carrick watakuwemo kina Steven Gerrard, Frank Lampard na Michael Owen huku wengi wengine wakiwa mbioni kuthibitisha.

MANUNITED-CARRICK-MAR2

Mwenyewe Michael Carrick ameeleza: “Kuichezea Klabu kubwa kabisa Duniani kwa Miaka 11 ni kitu ambacho nasikia fahari kubwa na ni heshima kubwa kutunukiwa hii Mechi ya Heshima. Gemu hii itakuwa spesho kwangu na Familia yangu na natumaini itakuwa Siku ya Kumbukumbu kubwa ya Sherehe kwa Washiriki wote.

Meneja wa Man United, Jose Mourinho, ameeleza: “Nimefurahi sana Michael amepewa Mechi hii. Michael ni Mtu wa ajabu, mwema na Profeshenali halisi. Analeta utulivu kwenye Kikosi chetu na kuwatuliza akili wenzake waweze kushambulia zaidi. Ni mwelewa mzuri wa Gemu na mfano bora mno kwa Wachezaji Vijana!”

Nae Ed Woodward, Makamu Mwenyekiti Mtendaji wa Manchester United, ameeleza: "Michael ni kielelezo halisi cha Mchezaji wa Manchester United. Anacheza kwa kipaji cha hali ya juu ambacho huonyesha hajitutumui. Ni Mchezaji Kitimu kwa Asilimia 100 na Wachezaji Chipukizi huegemea kwake.Tangu mwanzo alionyesha Ushujaa mkubwa kwa kuvaa Jezi yenye Namba ya Nguli Roy Keane na amejijenga zaidi!”

CLAUDIO RANIERI AFUKUZWA LEICESTER CITY, MIEZI 9 TU BAADA KUWAPA UBINGWA ENGLAND!

MABINGWAwa England LeicesterCity wamemfukuza kazi Meneja wao RANIERI-VARDY ikiwa ni Miezi 9 tu baada ya kuwapa, bila kutegemewa, Ubingwa wao wa kwanza wa England katika Historia yao.

Habari hizi zimetolewa na Bodi ya Leicester City na zimekuja Siku 1 tu baada ya Klabu hiyo kufungwa 2-1 huko Spain na Sevilla katika Mechi yao ya kwanza ya Raundi ya Mtoano ya Timu 16 ya UEFA CHAMPIONZ LIGI.

Ranieri, mwenye Miaka 65, aliiongoza Leicester, kwa mshangao wa wengi, kutwaa Ubingwa wa England Msimu uliopita wakiwa mbele kwa Pointi 10 lakini Msimu huu mambo yako mrama na wako hatarini kuporomoka Daraja.

Likitokea hilo basi wao ndio watakuwa Mabingwa Watetezi wa kwanza wa England kushuka Daraja tangu 1938.

Leicester wamepoteza Mechi zao 5 za Ligi zilizopita na ndio Klabu pekee katika Madaraja yote Manne ya England ambayo haijafunga hata Bao 1 la Ligi Mwaka huu 2017.

Mechi ijayo kwa Leicester ni kwao King Power Stadium Jumatatu ijayo dhidi ya Liverpool.

Jumamosi Februari 25

1800 Chelsea v Swansea City               

1800 Crystal Palace v Middlesbrough              

1800 Everton v Sunderland         

1800 Hull City v Burnley             

Southampton v Arsenal [IMEAHIRISHWA]

1800 West Bromwich Albion v Bournemouth              

2030 Watford v West Ham United         

Jumapili Februari 26

1630 Tottenham Hotspur v Stoke City             

Manchester City v Manchester United [IMEAHIRISHWA]

Jumatatu Februari 27

2300 Leicester City v Liverpool

INFANTINO WIKI HII KUKUTANA NA VIONGOZI WA SOKA AFRIKA HUKO JO’BURG na HARARE!

>>NI MPANGO KUMNG’OA ISSA HAYATOU CAF?

FIFA-CAF-BIFURAIS wa FIFA, Gianni Infantino, Wiki hii inayokuja anatarajiwa kukutana na Marais wa Vyama vya Soka Afrika zaidi ya 50 huko Johannesburg, Afrika Kusini.

Viongozi wote wa juu wa Nchi 54 Wanachama wa FIFA kutoka Afrika wamealikwa kwenye Mkutano huo wa Siku moja ulioitwisha na Infantino ambao utajadili mambo kadhaa ikiwemo hatua ya FIFA kuzipanua Fainali za Kombe la Dunia kuwa na Timu 48 na pia mabadilko kuhusu Mipango ya Maendeleo.

Mikutano hiyo itakuwa Miwili na Siku ya Kwanza Viongozo 25 wa Afrika watakutana na Infantino na Kundi jingine kukutana nae Siku ya Pili.

Hatua hii ya Infantino ni kinyume na desturi kwani kawaida FIFA hukutana na Viongozi wa Afrika kupitia Rais wa CAF, Issa Hayatou, na Kamati ya Utendaji yake.

Mikutano hiyo ya Johannesburg itafuatiwa na tripu ya Infantino huko Harare, Zimbabwe ambako atakutana na Rais wa Chama cha Soka cha Zimbabwe, Philip Chiyangwa, pamoja na Kundi la Viongozi wengine wa Soka Afrika waliolikwa mahsusi kwa kile kilichodaiwa kuhudhuria Bethdei Pati ya Mzimbabwe huyo.

Lakini Philip Chiyangwa ni Mpinzani mkubwa wa Issa Hayatou na anamuunga mkono Mgombea kutoka Madagascar, Ahmad, ambae atachuana na Hayatou kwenye Uchaguzi wa Rais wa CAF utakaofanyika huko Addis Ababa, Ethiopia hapo Machi 16.

Hayatou, mwenye Miaka 70, anasaka tena Urais ili abakie madarakani kwa Miaka 30 sasa tangu alipoanza Mwaka 1988.

Wiki iliyopita ilidaiwa Hayatou ametishia kumchukulia hatua Chiyangwa ikiwa ataendelea na Mkutano huo wa Harare ambao Mzimbabwe huyo amesisitiza ni Bethdei Pati na si kingenecho.

Lakini Wachambuzi wa Soka wanahisi kuwepo kwa Infantino huko Harare ni kumkubali Mpinzani wa Hayatou kwenye Uchaguzi wa CAF.

Mwaka Jana, Hayatou na CAF, ilimuunga mkono rasmi mpinzani wa Infantino kwenye Uchaguzi wa Rais wa FIFA, Sheikh Salman bin Ebrahim al Khalifa wa Baharin, ambae, hata hivyo, alibwagwa na Infantino.

Habari MotoMotoZ