RIPOTI SPESHO

MKUU WA MKOA DAR MAKONDA AFANYA ZIARA AZAM FC, AIPONGEZA KWA UWEKEZAJI

MAKONDA-AZAMMKUU wa Mkoa wa Dar es Salaam, Mheshimiwa Paul Makonda, leo mchana amefanya ziara kwenye Makao Makuu wa Klabu Bingwa ya Afrika Mashariki na Kati, Azam FC akiwa na lengo kuu la kuipongeza kutokana na juhudi kubwa wanazofanya za kuwekeza katika soka la Tanzania.

Mbali na kuipongeza Azam FC inayomilikiwa na familia ya mmoja ya wafanyabiashara maarufu Afrika, Alhaji Said Salim Bakhresa, pia ametoa shukrani zake kutokana na jitihada zinazoonyeshwa na mfanyabiashara huyo mzawa katika maeneo mengine aliyofanya uwekezaji mkubwa kwenye tasnia ya habari (Azam Media) na viwanda.

Kwenye msafara huo, Makonda aliambatana baadhi ya viongozi wengine wa Halmashauri ya Manispaa ya Temeke, alikofanya ziara tofauti kusikiliza kero za wananchi wa wilaya hiyo akiwa sambamba na Mkuu wa Wilaya hiyo, Felix Jackson Lyanivana.

Ugeni huo ulipokelewa na viongozi wa juu wa Azam FC, wakiongozwa na Ofisa Mtendaji Mkuu, Saad Kawemba, Makamu Mwenyekiti, Nassor Idrissa, Meneja wa timu, Phillip Alando, ambao katika kumalizia ziara hiyo waliweza kumtembeza kwenye maeneo mbalimbali yaliyofanyiwa uwekezaji ndani ya Azam Complex.

Akitoa neno lake kwenye ziara hiyo, Makonda alisema haina ubishi kuwa Azam FC ndiyo timu pekee iliyofanikiwa kuwekeza ipasavyo kwenye soka huku akidai kuwa timu hiyo imeshaanza kwa vitendo kutekeleza suala la kupunguza idadi ya vijana walioko mtaani wasiokuwa na dira wala matumaini.

“Leo hii mnatuunga mkono zaidi kwa sababu ni kiwanja kimoja na ni timu moja ambayo kila mtu aliyeko Dar es Salaam anaizungumzia, katika suala zima la kupunguza idadi ya vijana walioko mtaani wasiokuwa na dira wala matumaini nyinyi Azam mmeshaanza kutekeleza kwa vitendo na watu wote hatuwezi kuajiriwa serikalini, haiwezekani leo serikali ikaajiri watu wote.

“Inawezekana kabisa kila mtu na kipaji chake anaweza akafanya vizuri na mwisho wa siku akaendesha maisha yake, kwa hiyo tunawashukuru sana sana sana Azam FC,” alisema.

Makonda alichukua fursa hiyo pia kutoa wito kwa watu wengine wenye uwezo kujitokeza, na kuiga mfano wa watu wa Azam FC ili kuwa na timu nyingi zenye ushindani na kuondoa migogoro kwenye soka la Tanzania.

“Waige mfano wa Azam, watengeneze timu zao, watengeneze viwanja ili tuwe na watu wengi, tuwe na timu nyingi zenye ushindani na hata hii migogoro migogoro inayotokea Yanga na Simba, wenye hela zao wasihangaike, kama wamegoma kukodishwa waje tu watengeneze timu zao ili na wenyewe waendelee kunufaika kwa sababu mwisho wa siku tunajua tukiwa na timu nyingi kama ilivyo Azam FC, ikapatikana timu nyingine ya watu wenye uwezo kama nyie mnavyowajali vijana wenu ushindani utakuwa mkubwa sana.

“Na hivyo ndivyo tunaweza kuweka vijana wengi wakawa kwenye vipaji vyao tukajenga uchumi wetu kupitia ajira inayotokana na michezo na mwisho wa siku tukapeperusha vema bendera ya Taifa letu katika mataifa mbalimbali katika sekta nzima ya michezo, mimi naamini kwa kazi na mfano mnaoonyesha niwaombe watu wengine waendelee kuiga,” alisema.

Katika ziara hiyo, pamoja na mambo mengine Makonda amewaomba Watanzania waendelee kununua bidhaa zinazotengenezwa na wazawa akitolea mfano baadhi ya bidhaa zinazozalishwa na makampuni ya Bakhresa.

“Mfano kama hivi viwanda vyenu vinatengeneza juisi, mnatengeneza maji, mnatengeneza ngano, walioajiriwa ni Watanzania wenzetu kwa hiyo kadiri mnavyouza bidhaa zenu manake kuna uhakika wa kupanua biashara, mkipanua biashara wadogo zetu, kaka zetu wanapata ajira lakini la pili mkiendelea kuuza mnalipa kodi, ile kodi tunapata barabara, madawa, tunapata shule, tunapata kila kitu tunachokitafuta,” alisema.

Naye Ofisa Mtendaji Mkuu wa Azam FC, Saad Kawemba, akizungumza kwa niaba ya uongozi wa Azam FC, alimshukuru Makonda kwa ugeni wake huo ndani ya klabu hiyo, huku akichukua fursa hiyo pia kumwelezea historia fupi ya Azam tokea ianzishwe mwaka 2004 hadi ilipo mpaka sasa.

Mbali na historia, alimweleza timu mbalimbali zilizoko ndani ya Azam Complex, timu ya vijana (U-20) na ile ya wakubwa pamoja na mipango kabambe inayoendelea ya kuunda timu za vijana za chini ya umri wa miaka 15 na 17, mchakato unaoelekea ukingoni ukihusisha mikoa mbalimbali.

“Baada ya michuano ya Copa Coca Cola kutokuwa na mwelekeo, kama klabu tumeamua kuwafuata vijana kule walipo tumefanya majaribio katika mkoa wa Dar es Salaam, tumekwenda Zanzibar, Tanga, Morogoro na wiki iliyopita tulikuwa mkoani Mbeya tulikopata vijana saba, bado tutaendelea kufanya uwekezaji tutaenda mkoani Tabora, Mwanza, Kigoma na Mtwara,” alisema.

Aliongeza kuwa: “Kwa hiyo sisi tunaamini ya kuwa hata Mheshimiwa hapa Mkuu wa Mkoa utakuwa ni miongoni mwa wadau wetu wakubwa wa kutusapoti na karibu sana Azam FC usichoke kuja wakati wowote…Yote tunayoyafanya ni kutokana na kampuni mama ya Azam na wadhamini wetu ambao ni Benki ya NMB lakini haitoshi kwa hiyo tunachukua fursa hii kuyaomba makampuni mengine ambayo yanaweza kuona nafasi ya wao kuwekeza waje, tuna timu za vijana, njooni mfanye kazi na sisi tuweze kusomba mbele.”

IMETOLEWA NA AZAM FC [Kupitia Abducado Emmanuel November 22, 2016]

SIMBA MWENDOKASI ‘KUJIUZA KWA MO’, MKUTANO MKUU WA DHARURA DESEMBA 11 KUBADILI KATIBA!

SIMBA-MOSIMBA Leo imetoa tamko rasmi kuthibitisha kuwa watafanya Mkutano Mkuu wa Dharura wa Wanachama wao hapo Desemba 11 katika ukumbi wa Bwalo la Maofisa wa Jeshi la Polisi, Oysterbay, Dar es Salaam ili kubadilisha Katiba yao kwa kile kinachodhaniwa ni kupitisha njia Klabu hiyo kuuzwa Hisa zake.

Mfanyabiashara Mohamed Dewji, maarufu kama Mo, ana nia ya kununua Hisa za Simba za Asilimia 51 kwa Thamani ya Shilingi Bilioni 20 mpango ambao ulikubaliwa na Wanachama kwenye Mkutano wao wa Klabu.

Mara baada ya hatua hiyo, Yanga nao wakaanza mchakato wao wa kubadili mfumo wao wa uendweshaji.

Lakini zoezi hilo likaingia dosari baada ya Katibu Mkuu wa Baraza la Michezo Tanzania, BMT, Mohamed Kiganja, kusimamisha michakato ya Simba na Yanga ‘kubinafsishwa’ hadi Katiba za Klabu hizo zinazotambulika na Mamlaka husika kubadilishwa.

Baada ya Simba kukubaliana na Mo kuhusu kuuziwa Hisa, Yanga nao walikubaliana kumkodisha Mwenyekiti wao Yusuf Manji Klabu hiyo aiendeshe Kibiashara chini ya Kampuni yake kwa Miaka 10.

Mipango hiyo ya Vigogo hawa wa Soka Nchini pia iligonga mwamba TFF ambao pia walihoji kufuatwa kwa Katiba hizo.

Lakini nao Yanga waligonga mwamba kuitisha Mkutano Mkuu wa Wanachama wao ili kubariki kukodishwa Klabu kwa Manji baada ya wale waliodaiwa kuwa Wanachama wao kutinga Mahakamani na kupata Amri ya kuzuia Mkutano huo.

Tamko hili la Simba limetolewa Leo baada ya Kamati ya Utendaji yao kukaa Majuzi.

TAARIFA YA SIMBA IMESEMA:

SIMBA-TAARIFA

NYOTA 2 ZA GHANA ZASAJILIWA AZAM FC!

AZAM-NYOTA2-GHANAUONGOZI wa Klabu Bingwa ya Afrika Mashariki na Kati Azam FC, unayofuraha kuwaataarifu wapenzi wa soka kuwa jioni ya leo umefanikiwa kuingia mikataba na wasshambuliaji nyota kutoka Ghana, Samuel Afful na Yahaya Mohammed.

Zoezi la kuingiana mikataba limehudhuria na baadhi ya viongozi wakuu wa timu wakiwemo Ofisa Mtendaji Mkuu, Saad Kawemba, Meneja Mkuu, Abdul Mohamed, Kocha Mkuu Zeben Hernandez pamoja na wakala anayewasimamia wachezaji hao, Kingsley Atakorah, ambaye pia ni Ofisa Mtendaji Mkuu wa Adom Wonders Academy ya nchini Ghana.

Wakati Afful, 20, akisaini mkataba wa miaka mitatu, Mohammed aliyetua nchini leo mchana akitokea Ghana naye amesaini kandarasi ya miaka miwili tayari kabisa kuanza kuitumikia timu hiyo yenye maskani yake Azam Complex, Chamazi, Dar es Salaam.

Afful ambaye mpaka sasa yumo katika vikosi vya timu za vijana za Ghana chini ya umri wa miaka 20 na 23, anajiunga Azam FC akitokea timu ya Sekondi Hasaacan ya Ghana, ambayo aliifungia mabao tisa timu hiyo msimu uliopita.

Moja ya rekodi yake ni kuifungia bao muhimu timu ya Taifa ya Ghana chini ya umri wa miaka 20 (U-20) mwaka jana dhidi ya Zambia kwenye ushindi wa mabao 2-1, lililoipa nafasi ya kushiriki fainali za Kombe la Dunia nchini New Zealand, baada ya kutinga nusu fainali ya Mataifa ya Afrika kwa Vijana (U-20) zilizofanyika Senegal mwaka jana.

Mohammed ambaye ni mshambuliaji mzoefu anayetokea Aduana Stars, alikuwa ni mfungaji bora namba mbili wa Ligi Kuu ya Ghana msimu uliopita akifunga mabao 15, pungufu ya mabao mawili na kinara Latif Blessing (Liberty Proffessional) aliyetupia 17.

Azam FC tunaamini ya kuwa ujio wa nyota hao, utazidi kuipa nguvu timu yetu kuelekea kwenye michuano inayotukabili mbeleni, mzunguko wa pili wa Ligi Kuu ya Vodacom Tanzania Bara (VPL), Kombe la Kagame (CECAFA Kagame Cup) tukiwa kama mabingwa watetezi, Kombe la Shirikisho (Azam Sports Federation Cup) na Kombe la Shirkisho Afrika (CC) mwakani.

Azam FC tunapenda kuwafahamisha mashabiki wetu kuwa tutaendelea kuyafanyia kazi mapendekezo ya benchi la ufundi kwa kukifanyia marekebisho kikosi chetu katika usajili huu wa dirisha dogo uliofunguliwa jana, lengo ni kukipa nguvu zaidi kikosi chetu bili kifanye vizuri zaidi katika michuano ya hapa nchini pamoja na ile ya Kimataifa.

Azam FC itaendelea kuwathamini mashabiki wake na tunaamini ya kuwa uwepo wenu utaendelea kutupa nguvu zaidi katika mapambano yetu makubwa ya kila siku na yaliyoko mbele yetu, tunachowaahidi ni kuendelea kuwapa furaha zaidi kwa kupata matokeo bora uwanjani na tunawaomba muendelee kuwa pamoja nasi.

Imetolewa na Uongozi wa Azam FC

TOKA TFF: LIGI VIJANA UZINDUZI BUKOBA NOV 15, STARS YARUKA KWENDA HARARE

LIGI YA VIJANA U20, UZINDUZI BUKOBA NOV. 15

TFF-HQ-1-1-1Ligi ya vijana wenye umri wa chini ya miaka 20 za klabu zote za Ligi Kuu ya Vodacom inatarajiwa kuanza Novemba 15, 2016 kwa mchezo maalumu wa ufunguzi utakaofanyika Uwanja wa Kaitaba, Bukoba mkoani Kagera.

Shirikisho la Mpira wa Miguu Tanzania (TFF), linachukua nafasi hii kuzikumbusha klabu kuwa zina taarifa kuhusu kuwako kwa ligi hiyo ya U20 na kwamba mara ya mwisho kufanya hivyo ilikuwa ni Novemba 3, mwaka huu katika barua maalumu kwa kila klabu yenye Kumb. Na. TPLB/CEO/2016/036.

Tayari klabu hizo zimepewa shilingi milioni 10 (Sh 10,000,000) kutokana na udhamini wa Benki ya DTB kwa ajili ya kushiriki michuano hiyo. Pia  kila klabu itapewa shilingi milioni 10 (Sh 10,000,000) nyingine kutokana na udhamini wa matangazo ya ligi ya U20 wa Azam Tv.

Kwa udhamini huo kila klabu itajigharimia usafiri wa kwenda na kurudi kituoni, malazi, na chakula kwa kipindi chote cha mashindano. Vituo vilivyopangwa ni Dar es Salaan ambako kuna timu za JKT Ruvu, Simba, Ruvu Shooting, Ndanda, Majimaji ya Songea, Mtibwa, Mbeya City na Tanzania Prisons.

Kituo kingine ni Bukoba mkoani Kagera ambako kuna timu za Azam, African Lyon, Mbao FC, Toto Africans, Mwadui ya Shinyanga kama ilivyo Stand United, Kagera Sugar na Young Africans ambazo zitafungua dimba hiyo Novemba 15 kwa mchezo pekee.

Tunazikumbusha klabu kuzingatia Kanuni ya 42 (27) ya Ligi Kuu ya Vodacom inayosema: “Klabu ambayo haikupeleka uwanjani timu ya U20, mechi ya kwanza itapigwa faini ya Sh 2,000,000 na kunyang’anywa na kupoteza mchezo, mechi ya pili itapigwa faini ya Sh 2,000,000 na kunyang’anywa pointi tatu katika Ligi ya Wakubwa (Ligi Kuu) na Ligi ya Wadogo (u20).

Pia tunazikumbusha klabu kuwa kwa mujibu wa Kanuni, wachezaji saba (7) kutoka U17 wanaruhusiwa kuchezea timu ya U20. Ruhusa hiyo ni kwa wachezaji wa U17 waliosajiliwa, kwa maana kuwa katika ligi zote wachezaji  wanatambuliwa kwa kutumia leseni.

TAIFA STARS YAONDOKA MCHANA HUU NOVEMBA 11, 2016

+++Timu ya Mpira wa Miguu ya Tanzania ‘Taifa Stars’ inayodhaminiwa na Bia ya Kilimanjaro kutoka Kampuni ya Bia Tanzania inatarajiwa kuondoka leo Ijumaa saa 7.15 mchana Novemba 11, mwaka huu kwenda Harare, Zimbabwe kwa ajili ya kucheza na wenyeji kwenye mchezo wa kirafiki wa kimataifa utakaofanyika Novemba 13, mwaka huu.

Mchezo huo wa kirafiki wa kimataifa utakaofanyika jijini Harare, umeratibiwa kwa mujibu wa kalenda ya Shirikisho la Kimataifa la Mpira wa Miguu (FIFA) ambalo huwa na kalenda ya wiki ya mechi za kimataifa kwa wanachama wake – Tanzania ni miongoni mwao. Kikosi cha Taifa Stars chini ya Kocha Charles Boniface Mkwasa ni: Makipa  Deogratius Munishi na Aishi Manula,Mabeki ni Erasto Nyoni Michael Aidan, Mwinyi Haji, Mohamed Hussein na Vicent Andrew.

Viungo wa Kati ni Himid Mao, Mohammed Ibrahim, Jonas Mkude na Muzamiru Yassin na wale wa pembeni ni ni Shiza Kichuya, Simon Msuva na Jamal Mnyate na washambuluaji ni Ibrahim Ajib, John Bocco, Mbwana Samatta, Elius Maguli, Thomas Ulimwengu na Omar Mponda     .

Mchezo huu utakuwa na faida zaidi kwa Tanzania kama ikiwafunga Wazimbabwe kwa kuwa itaongeza alama za nyongeza kwa kushinda ugenini.

Matokeo ya mchezo huo, ni sehemu malumu kupima viwango vya ubora na uwezo wa timu za taifa. Kwa sasa Tanzania inashika nafasi ya 144 kati ya nchi 205 wanachama wa FIFA zilizopimwa ubora. Zimbambwe yenyewe inashika nafasi ya 110.

Argentina inaongoza ikifuatiwa na Ubelgiji anakocheza Mbwana Samatta – nyota wa kimataifa wa Tanzania. Samatta anacheza klabu ya K.R.C Genk inayoshiriki Ligi Kuu ya Ubelgiji. Timu nyingine bora kimataifa ni Chile, Colombia na Ujerumani.

Katika Bara la Afrika, Ivory Coast ambayo ni ya 31 kwa ubora duniani ndiyo inayoongoza ikifuatiwa na Senegal (32), Algeria (35), Tunisia (38) na Ghana (45).

RAIS MALINZI ATUMA SALAMU ZA RAMBIRAMBI MSIBA WA HAFIDHI

Rais wa Shirikisho la Mpira wa Miguu Tanzania (TFF), Jamal Emil Malinzi amepokea kwa masikitiko makubwa taarifa za kifo cha Mbunge wa Jimbo la Dimani Fumba, Zanzibar, Mheshimiwa Hafidh Tahir Ali aliyefariki dunia kwenye Hospitali Kuu ya Dodoma usiku wa kuamkia leo Novemba 11, 2016.

TFF ilijulishwa kifo cha Mheshimiwa Hafidh na Mbunge wa Jimbo jipya la Ulyankulu, Wilaya ya Kaliua mkoani Tabora, John Kadutu ambaye alisema leo walikuwa na programu ya kusafiri kwenda Tabora kushiriki mazishi ya Mbunge wa zamani wa Urambo, Samwel Sitta lakini kabla ya kwenda mazoezi alfajiri, waliarifiwa kuhusu kifo hicho. “Inasikitisha, lakini ni ya Mungu yote,” alisema Kadutu.

Kifo hicho kimemsikitisha Rais Malinzi ambaye alituma salamu za pole na rambirambi kwa Spika wa Bunge la Jamhuri ya Muungano wa Tanzania, Job Ndugai akisema taifa limepata msiba mwingine mzito kwa Mwamuzi wa zamani wa kimataifa wa mpira wa miguu aliyekuwa anatambuliwa/kuwa na beji ya Shirikisho la Kimataifa la Mpira wa Miguu (FIFA).

Hakika alikuwa kiongozi wa karibu na watu hasa kutokana na michezo ambayo siku zote alikuwa akiota ndoto za kuifikisha mbali hasa ukirejea kuwa ni jana tu Novemba 10, mwaka huu alichaguliwa na wanachama wenzake wa Young Africans  - tawi la Bunge kuwa Katibu wa tawi hilo chini ya Mwenyekiti Venance Mwamoto – Mbunge wa Kilolo mkoani Iringa.

Ukaribu huo na watu ndio uliompaisha wakati fulani kuwa mmoja watangazaji mahiri wa redio alipoganya kazi hiyo na manguli wengine kama David Wakati kabla ya kuwa Msemaji wa Serikali ya Awamu ya Tano ya SMZ kabla ya kuwa Mbunge wa RahaLeo.

“Wiki hii imekuwa ngumu kwangu, tumepoteza viongozi wa mfano na wanamichezo mahiri katika kucheza michezo hususani mpira wa miguu na kuuongoza hata kama ni kwa mawazo yao chanya tu. Mheshimiwa Hafidhi ni sehemu ya wanamichezo hao mahiri, ni pigo kubwa hasa kwenye tasnia ya mpira wa miguu. Dua zetu ni Mwenyezi Mungu amghufie na kumrehemu marehemu,” alisema Malinzi.

Katika salamu zake za rambirambi, Rais Malinzi pia alitoa pole kwa familia ya marehemu Hafidh Tahir Ali, ndugu, jamaa, majirani, na marafiki hususani wapiga kura wa Jimbo la Dimani Fumba kwa kumpoteza kiongozi wao hivyo kuwataka kuwa watulivu wakati huu mugumu kwao.

Pia Rais Malinzi amesema vifo cha Sheikh Said Mlohammed, Mzee Mheshimiwa Sitta na Mheshimiwa Tahir, vibaki kuwa sehemu ya funzo kwetu katika kujiandaa na maisha ya baadaye kwa sababu zote ni wa Mwenyezi Mungu na kwake tutarejea.   

Inna lillah wainn ilayh  Rajiuun.

TWIGA STARS KUJIULIZA TENA KWA CAMEROON JUMAPILI

Timu ya Taifa ya Mpira wa Miguu Wanawake ‘Twiga Stars’ jana Novemba 10, 2016 ilipoteza kwa taabu mchezo wake wa kwanza wa kirafiki wa kimataifa dhidi ya wenyeji Cameroon ambayo ilipata mtihani mzito kwa Watanzania kwa dakika zote kabla ya kuibuka kwa ushindi wa mabao 2-0.

Cameroon ambayo ilijipanga kushinda mabao mengi, ilitolewa jasho na hivyo kuomba mchezo mwingine ambao sasa utafanyika Jumapili Novemba 13, mwaka huu jijini Yaounde na Kocha Mkuu wa Twiga Stars, Sebastian Nkoma amesema: “Nimeona upungufu katika mchezo wa jana, nafanyia kazi.”

Bao la kwanza katika mchezo wa jana lilifungwa na Mshambuliaji Ngoya Ajara wa Klabu ya Sundsvalls ya Sweden ambaye pia ndiye Mchezaji Bora wa mwaka 2016 nchini Cameroon wakati bao la pili lilifungwa na Kiungo wa Klabu ya Aurillac ya Ufaransa Ngono Mani Michelle katika dakika ya 71.

Twiga Stars wao wamealikwa na Waandaaji wa fainali za Kombe la Mataifa ya Afrika kwa wanawake 2016 – Cameroon ambao wameamua kuipa heshima Tanzania na kuona kuwa timu hiyo ina ubora wa na kwamba inafaa kuipimana ubavu kabla ya kuanza kwa fainali hizo Novemba 19, mwaka huu.

Twiga Stars ambayo sehemu kubwa ya kikosi hicho kinaundwa na wachezaji wa timu ya taifa ya Wanawake ya Tanzania Bara yaani Kilimanjaro Queens ina rekodi nzuri ya kuwa kinara wa viwango vya ubora kwa nchi za Afrika Mashariki na kati lakini zaidi ni mabingwa wapya wa ukanda huo – ubingwa uliopatikana Septemba, mwaka huu huko Uganda.

Rekodi hizo zimesukuma Shirikisho la Mpira wa Miguu la Cameroon (FECAFOOT) – nyumbani kwa Rais wa CAF, Issa Hayatou kuikubali Twiga Stars na hivyo kuomba kucheza nayo mwishoni mwa wiki hii. Tayari Twiga Stars imeanza maandalizi ya kutosha chini ya Makocha Sebastian Nkoma na Wasaidizi wake Edna Lema na El Uterry Mohrery.

Kikosi cha Twiga Stars wamo makipa, Fatma Omari na Najiat Abbas; mabeki ni Wema Richard, Sophia Mwasikili, Anastasia Katunzi, Maimuna Hamisi, Fatuma Issa, Happiness Mwaipaja na Mary Masatu wakati viungo ni Donisia Minja, Stumai Abdallah, Amina Ally, Anna Mwaisura na Fadila Kigarawa ilhali washambuliaji ni Fatuma Swalehe, Asha Rashid na Mwanahamisi Omari.

Wakati huo huo, taarifa kutoka zinasema timu ya taifa ya Vijana wenye umri wa chini ya miaka 17 ‘Serengeti Boys’ imefungwa bao 1-0 na Seongnam katika mchezo wa kwanza wa kuwania Kombe la Korea Kusini katika michuano iliyoandaliwa na Shirikisho la Mpira wa Miguu la Korea Kusini. Mchezo huo ulifanyika jijini Seoul, Korea Kusini na goli moja lililofungwa kipindi cha kwanza, vijana wetu wameonesha uwezo mkubwa sana.

Kikosi kilicho anza ni Ramadhani Kabwili (1), Kibwana Ally (12), Nickson Kibabage (3), Ally Msengi (14), Dickson Job (5), Ally Ng'azi (2), Shaban Zubeir (13), Asad Juma (10), Mohamed Rshid (11), Nashon Kelvin (7), na Muhsin Makame (19). Kipindi cha pili benchi la Ufundi lilifanya mabadiliko aliingia Cyprian Mtesi (8) Kuchukua nafasi ya Muhsin Mkame (2) na Errick Nkosi (4) kuchukua nafasi ya Ally Ng'anzi (2).

IMETOLEWA NA TFF

CAF: DAU LA WASHINDI, WASHIRIKI MICHUANO AFRIKA LAPANDA, CHANGAMOTO KWA YANGA, SIMBA, AZAM!!

CAFCC-YANGA16KUANZIA Mwaka 2017, Mashindano yote ya CAF Barani Afrika yatakuwa na Fedha nyingi zaidi kwa Washiriki na Washindi wake.

Tangazo hili la CAF, Shirikisho la Soka Barani Afrika, limekuja tu mara baada yao kusaini Mkataba na Kampuni ya Mafuta ya France TOTAL ambao unao thamani ya zaidi ya Dola Bilioni 1.

Hivyo Washindi wa AFCON, Kombe la Mataifa ya Afrika, watazoa Dola Milioni 4 kutoka Dola 1.5 ambazpo walipewa Mabingwa wa AFCON 2015 Ivory Coast.

Mabingwa wa CC, CAF CHAMPIONZ LIGI watazoa Dola Milioni 2.5 ikipanda toka Dola Milioni 1.5 walizopata hivi Juzi Klabu ya South Afrika Mamelodi Sundowns kwa kutwaa Ubingwa wa Afrika.

Kwenye Mashindano ya CL, CAF ya Kombe la Shirikisho, Mshindi sasa ataondoka na Dola Milioni 1.25 kutoka Dola 660,000 walizozoa TP Mazembe hivi Juzi.

Zawadi kwa Timu zinazotinga Hatua ya Makundi ya CC na CL zitapanda pamoja na Timu kuongezwa Hatua hiyo kutoka 8 kuwa 16.

Mshindi wa CAF super Cup atapewa Dola 100,000 ikiwa ni ongezeko la Asilimia 33.3 wakati Mshindi wa CHAN, Kombe la Mataifa ya Waafrika kwa Wachezaji wa ndani ya Afrika sasa atapa Dola 1.25 kutoka Dola 500,000 za sasa.

Bilas haka ongezeko hili la Bingo hii ni changamoto kubwa kwa Klabu zetu za Tanzania, Yanga, Simba na Azam FC, na wengineo kupigana vikumbo humu Bongo kusaka Mataji ili kucheza Klabu Afrika na kuzoa Fedha hizo bwelele.