RIPOTI SPESHO

TUZO ZA CAF 2016: MAHREZ, ONYANGO NDIO BORA AFRIKA!

>>DIAMOND PLATINUMZ ATUMBUIZA KWENYE HAFLA!

MAHREZ-CAF-BORAKWENYE HAFLA iliyofanyika Jana ndani ya International Conference Centre huko Abuja, Nigeria Winga kutoka Algeria anaewachezea Mabingwa wa England Leicester City, Riyad Mahrez, ameteuliwa kuwa ndie Mchezaji Bora Afrika kwa Mwaka 2016 huku Kipa wa Uganda Denis Onyango akitwaa Tuzo kama hiyo kwa Wachezaji wanaocheza ndani ya Afrika.

Mahrez, mwenye Miaka 25, amekuwa Mualgeria wa kwanza kushinda Tuzo hiyo kwa kuzoa Kura 361 akiwashinda Mshindi wa 2015 Pierre-Emerick Aubameyang wa Gabon na Borussia Dortmund aliepata Kura 313 na Sadio Mane wa Senegal na Liverpool aliepata Kura 186.

Kura kwa Washindi zilipigwa na Makocha Wakuu wa Timu za Taifa Wanachama wa CAF, Wajumbe wa Kamati ya Habari ya CAF na Kamati Ufundi na Maendeleo ya CAF na Jopo la Mabingwa 20.

Onyango, mwenye Miaka 31, ambae pia ni Kipa wa Mabingwa wa Afrika kwa Klabu, Mamelodi Sundowns, ameweka Historia kuwa Kipa wa Kwanza kutwaa Tuzo hii.

Tuzo nyingine zilizotolewa Jana ni:

-Mchezaji Bora kwa Wanawake: Asisat Oshoala [Nigeria]

-Kipaji che Matumaini: Kelechi Iheanacho [Nigeria]

-Mchezaji Bora Kijana: Alex Iwobi [Nigeria]

-Klabu Bora: Mamelodi Sundowns

-Kocha Bora: Pitso Mosimane [Mamelodi Sundowns]

-Timu ya Taifa Bora: Uganda

-Refa Bora: Bakary Papa Gassama [Gambia]

-Kiongozi Bora: Manuel Lopes Nascimento [Guinea Bissau]

-Malejendari: Laurent Pokou [Ivory Coast] & Emilienne Mbango [Cameroon].

Kwenye Hafla hii ya Tuzo za Ubora Afrika Wanamuziki waliotumbuiza walikuwa ni Femi Kuti, Flavour, Yemi Alade na Omawumi, wote kutoka Nigeria, Kundi la Afrika Kusini, Muffinz, na Diamond Platinumz wa Tanzania.

CAF-XI

KARIBU KARIAKOO, EMMANUEL MARTIN

Na Ally Kamwe

YANGA-MARTINSKaribu Kariakoo, Emmanuel Martin.

Karibu Dar es salaam kwa Mheshimiwa Paul Makonda, karibu sana katika jiji la maajabu.

Ni ardhi hii aliyozikwa Steven Kanumba na filamu zake, ni sehemu hii hii anapoteketea Chid Benz na umwamba wake, nini zaidi unahitaji kujuzwa kuhusu Dar es salaam?

Kila mtu ana sura yake na moyo wake hapa, usidanganyike na vicheko vyao. Wabaya na wazuri wanaishi hapa!

Unataka starehe? Zipo hapa, mpaka zile zisizompendeza shetani. Hii ndio Dar es salaam tamu iliyomkimbiza Mr Nice na kumfedhehesha 20 Percent akiwa na utamu wake.

Hili ndilo jiji pekee duniani wanakopatikana watu aina ya Shilole, Snura, Amber Lulu na Giggy Money kwa wakati mmoja.

Wako wazuri hapa wa kila rangi na utakutana nao kama alivyokutana nao mahotelini Andrey Coutinho kipindi kile, uamuzi ni wako kijana mwenzangu.

Karibu sana Emmanuel.

Kama umekuja na akili zako kama alivyokuja nazo Farid Mussa kipindi kile, bila shaka una pepo yako ndogo ya kuishi pale Kariakoo.

Ila kama umekuja na mabegi tu kama alivyokuja nayo Malimi Busungu, jiandae kuishangaa Kariakoo kama anavyoishangaa Mahadhi Juma hivi sasa, jiji limekosa adabu hili.

Nilivyokutazama na niliyoyasikia baada ya ule mchezo wa Yanga dhidi ya Ndanda, hakika nafsi yangu ilijiridhisha kuwa ‘Dar es salaam imepata mtu wao’

Lile jiji la maajabu sasa limepata mtu wake wa maajabu!

Wakati huu huruma yangu iko Deus Kaseke, najua yuko kwenye vita kubwa na nafsi yake.

Uwezo wa Emmanuel unatishia moja kwa moja nafasi yake katika kikosi cha kwanza.

Kaseke anatakiwa kupambana sana kama ambavyo Geofrey Mwashiuya anavyotakiwa kuamka usingizini, asipokubali kuamka kwa hiari yake, ule mguu wa kushoto wa Emmanuel utamlaza milele.

Bahati nzuri Emmanuel amekuja Yanga na amekutana na George Lwandamina.

Kocha anayemaini uwezo kabla ya jina, kocha anayetengeneza mfumo utakaofatwa na wachezaji na si kuwa na mfumo utakaofata wachezaji.

Sikushangaa na sitashangaa kama Said Makapu ataendelea kumburuza benchi Justice Zulu ‘Mkata umeme’, sitashangaa hata kidogo.

Macho yakishamdanganya Lwandamina, hana muda tena wa kuliamini sikio.

Emmanuel hakwenda Yanga kwa nguvu ya viongozi kama wanavyokwenda wengine, hayuko pale kwa bahati mbaya, uwezo wake ulionekana na kocha ndiye aliyependekeza asajiliwe.

Mara ngapi unaona hili likitokea kwenye usajili wa Bongo uliotawaliwa na tabia za watu wa ‘bongo movie’?

Emmanuel ana muda mwingi sana wa kucheza Yanga, ana muda mwingi wa kukuza kiwango chake na kuzihamisha ndoto zake kuwa kweli.

Yanga ni mahala sahihi sana kwake kwa wakati huu, kwanini? Sababu ni mbili tu. Moja, Atacheza mechi nyingi kubwa, hivyo atapata uzoefu na mbili, yuko kwenye barabara ya kwenda Ughaibuni.

Ndio, michuano ya Ligi ya mabingwa ni ndoto za wachezaji wengi wa Kiafrika, Yanga wataanza kucheza Februari mwaka huu, ni fursa kwa Emmanuel kuonyesha thamani yake kwa faida ya klabu na maendeleo yake binafsi.

Akili yake inatakiwa kutulia mara mbili zaidi anavyotulia akiwa na mpira mguuni, ni wakati wake wa kufungua macho na kuchagua njia anayotaka kupita.

Anataka sifa na makelele ya Kariakoo? Kipo kiti cha Mrisho Ngassa ambacho hakijapata mtu wa kukikalia mpaka leo hii, ziko laki na viroba vya mchele vinamsubiri kama akiamua kuwa ‘mfalme wa Kariakoo’.

Ila kama nafsi yake ina wivu wa kufika alipofika Mbwana Samatta au anapokwenda Farid Mussa, nafasi na wakati ni huu.

Magazeti hayataacha kuandika habari zake, akifanya vyema yatasifia, akiboronga atashughulikiwa vilevile, asiyaweke sana akilini japo ni changamoto anayotakiwa kuizoea kuanzia sasa.

Binafsi nimeona nuru kubwa ikiangaza ndani yake, nimemuona mchezaji mkubwa wa Tanzania katika kipindi cha miaka mitatu baadae kama nilivyowahi kumtazama Shiza Kichuya.

Wao ndio mashujaa wa maisha yao na wataamua kilicho sahihi kwao. Kitu pekee anachotakiwa kukumbuka kwa sasa, yuko Kariakoo iliyo ndani ya jiji la Dar es salaam, mengi yasiowezekana kwingine, hufanyika kirahisi sana hapa.

MAPINDUZI CUP: YAANZA, TAIFA JANG’OMBE YAWATUNGUA ‘WAPWA’ ZAO JANG’OMBE BOYS!

AMAAN-STADIUM-17MASHINDANO ya Kombe la Mapinduzi ya kuenzi Mapinduzi tukufu ya Visiwa vya Zanzibar na Pemba yameanza Usiku huu huko Amaan Stadium, Zanzibar kswa Timu pinzani kucheza na Taifa Jang’ombe kuifunga Jang’ombe Boys 1-0 kati Mechi ya Kundi A.

Bao la ushindi la Taifa Jang’ombe lilifungwa Dakika ya 83.

Michuano yapo na Makundi Mawili na Kundi A lina timu za Simba ya Dar es Salaam, Taifa ya Jang’ombe, Jang’ombe Boys, KVZ na Mabingwa Watetezi, URA ya Uganda.

Kundi B lina Timu za Yanga, Azam FC, Jamhuri na Zimamoto.

+++++++++++++++++

MAKUNDI:

KUNDI A

-Simba

-Taifa Jang;ombe

-Jang’ombe Boys

-KVZ

-URA [Mabingwa Watetezi, Toka Uganda]

KUNDI B

-Yanga

-Azam FC

-Jamhuri

-Zimamoto

+++++++++++++++++

Baada ya Mechi hii ya Leo, Januari 1 Mabingwa Watetezi, URA watacheza na KVZ kuanzia Saa 10 Jioni na baadae Simba kumenyana na Taifa ya Jang'ombe Saa 2 na Nusu Usiku.

Mechi za Kundi B zitaanza Januari 2, kwa Azam FC kucheza na Zimamoto kuanzia Saa 10 Jioni na Yanga kuivaa Jamhuri Saa 2 na Nusu Usiku.

KOMBE LA MAPINDUZI

Ratiba/Matokeo:

Desemba 30, 2016

Taifa Jang'ombe 1 Jang'ombe Boys 0

Januari 1, 2017

KVZ VS URA (Saa 10:00 jioni)

Simba vs Taifa Jang'ombe (Saa 2:30 usiku)

Januari 2, 2017

Azam vs Zimamoto (Saa 10:00 jioni

Yanga vs Jamhuri (Saa 2:30 usiku)

Januari 3, 2017

Jang'ombe Boys vs URA (Saa 10:00 jioni)

KVZ vs Simba (Saa 2:30 usiku)

Januari 4, 2017

Zimamoto vs Yanga (Saa 10:00 jioni)

Jamhuri vs Azam saa 2:30 usiku.

Januari 5, 2017

KVZ vs Jang'ombe Boys (Saa 10:00 jioni)

Simba vs URA (Saa 2:30 usiku)

Januari 6, 2017

Taifa Jang'ombe vs KVZ (Saa 2:30 usiku)

Januari 7, 2017

Jamhuri vs Zimamoto (Saa 10:00 jioni)

Yanga vs Azam (Saa 2:30 usiku)

Januari 8, 2017

Simba vs Jang'ombe Boys (Saa 10:00 jioni)

Taifa Jang'ombe vs URA (Saa 2:30 usiku).

Januari 10, 2017

Nusu Fainali

Nusu Fainali ya kwanza (Saa 10: 00 jioni)

Nusu Fainali ya Pili (Saa 2:30 usiku)

Januari 13, 2017

FAINALI

Saa 2: 30 usiku.

BAADA KUZOA TUZO NYINGINE, RONALDO: '2016 NI MWAKA BORA KWANGU!'

>’WANAONITILIA SHAKA, HUU NDIO USHAHIDI!’

GLOBAL-SOCCER1STAA wa Real Madrid na Portugal Cristiano Ronaldo ametoboa kuwa Mwaka 2016 ndio Mwaka Bora kwake hadi sasa baada ya kutwaa Tuzo nyingine, safari hii ikiwa ni ile ya Globe Soccer Award.

Mwaka huu, Ronaldo aliiwezesha Real Madrid kutwaa UEFA CHAMPIONZ LIGI na pia Nchi yake Portugal kubeba EURO 2016 huku Majuzi tu Real Madrid ikitwaa FIFA Kombe la Dunia kwa Klabu.

Mapema Mwezi huu, Ronaldo alitwaa Tuzo iliyotukuka ya Ballon d'Or ya Mchezaji Bora Duniani kwa Mwaka 2016.

Jana, huko Dubai, Ronaldo alitajwa kuwa ndio Mshindi wa Tuzo nyingine kubwa iitwayo Globe Soccer Award.

Akiongea kuhusu Tuzo hii mpya, Ronaldo alisema: “Kwa ujumla na binafsi, pengine huu ndio Mwaka Bora mno kwangu!”

Aliongeza: “Tumeshinda UEFA CHAMPIONZ LIGI na Real Madrid, tulitwaa Taji kubwa na Portugal, nilishinda Ballon d'Or, Kombe la Dunia kwa Klabu. Siwezi kuomba zaidi!”

Alimaliza: “Kwa Watu wanaonitilia shaka me, Real Madrid na Timu ya Taifa, sasa wana ushahidi. Tumeshinda kila kitu!”

Ronaldo aliwashukuru Wachezaji wenzake wote.

Nae Kocha wa Timu ya Taifa ya Portugal, Fernando Santos, ametajwa kuwa ndio Kocha wa Mwaka katika Sherehe hizohizo za Tuzo za Globe Soccer Award.

Real Madrid ndio iliyopewa Tuzo ya Timu Bora ya Mwaka, Jorge Mendes akichaguliwa kuwa Wakala Bora wa Mwaka huku Refa Bora wa Mwaka ni Mwingereza Mark Clattenburg.

Tuzo hizo zilikabdhiwa na Rais wa FIFA Gianni Infantino.

GLOBAL-SOCCER2

VPL FUNGA MWAKA KUANZA IJUMAA NA MABINGWA YANGA NA LYON UHURU DAR, MECHI 13 KUFUATA, 2 ZA FUNGUA MWAKA MPYA!

VPL: MECHI 14 ZA FUNGA MWAKA, MBILI KUFUNGUA MWAKA

VPL-LOGO-MURUAMechi 14 za Ligi Kuu ya Vodacom zinatarajiwa kufanyika wakati huu wa msimu wa kufunga mwaka 2016 na mbili za zitafungua mwaka 2017 ambako Kituo cha Televisheni cha Azam - Wadhamini wenza wa ligi hiyo, wamethibitishia Shirikisho la Mpira wa Miguu Tanzania (TFF) kupata burudani kwa michezo yote kulingana na ratiba.

Katika Ligi hiyo ambayo pia inabarikiwa na Benki ya Diamond Trust (DTB), michezo 15 ya kipindi cha sikukuu za kufunga na kufungua mwaka inatarajiwa kuanza saa 10.00 jioni isipokuwa ule wa Mbao FC na Mwadui uliopangwa kuanza saa 8.00 mchana kama itakavyojieleza hapo chini kwenye mtiririko wa ratiba. 

Burudani kwa Wote katika michezo hiyo kutoka Azam Tv, zinaanzia mchezo wa kesho Ijumaa wa Desemba 23, mwaka huu ulipewa jina la Na. 129 utakaozikutanisha timu za African Lyon na Young Africans kwenye Uwanja wa Uhuru, Dar es Salaam, Kamishna wa mchezo anatarajiwa kuwa Idelfonce Magali kutoka Morogoro.

Katika mchezo huo unaotarajiwa kuchezeshwa na Mwamuzi, Ludovic Charles kutoka mkoani Tabora akisaidiwa na John Kanyenye wa Mbeya (Mshika Kibendera Na. 1) na Alnord Bugado wa Singida (Mshika Kibendera Na. 2), Mwamuzi wa Akiba – Mezani anatarajiwa kuwa Israel Nkongo kutoka Dar es Salaam.

Jumamosi Desemba 24, 2016 kutakuwa na mechi sita ukianzia ule wa Mbeya City na Toto Africans zitacheza kwenye Uwanja wa Sokoine jijiji Mbeya katika mchezo Na. 130 utakaosimamiwa na Kamishna George Komba wa Dodoma wakati Mwamzi wa kati atakuwa Shakaile ole Shangalai wa Pwani huku wasaidizi wake wakiwa ni Khalfan Sika pia wa Pwani na Vecent Milabu wa Morogoro. Mwamuzi wa akiba atakuwa Cherles Mwamlima.

Mchezo Na. 131 utazikutanisha timu za Kagera Sugar na  Stand United katika Uwanja wa  Kaitaba, uliko Kagera ambako utasimamiwa na EPL-DES22Kamishna Nassoroi Hamduni wa Kigoma huku Mwamuzi akiwa ni Jacob Adongo wa Mara akisaidiwa na Joseph Masija na Robert Luhemeja kutoka Mwanza na Mezani atakuwa  Jonesia Rukyaa wa Kagera.

Ndanda itaendelea kubaki nyumbani kwenye Uwanja wa Nangwanda Sijaona, Mtwara na baada ya kucheza na Simba juma lililopita na kupoteza mchezo huo, safari hii inaikaribisha Mtibwa Sugar ya Morogoro katika mchezo Na. 132 utakaosimamiwa na Kamishna Jimmy Lengwe wa Morogoro wakati Mwamuzi atakuwa Andrew Shamba wa Pwani akisaidiwa na Haji Mwalukuta wa Tanga na Jeremiah Simon wa Dar es Salaam. Mezani atakuwa Abubakar Mtulo.

Siku hiyo pia kutakuwa na mchezo kati ya Simba na JKT Ruvu kwenye Uwanja wa Uhuru, Dar es Salaam. Mchezo huo Na. 133 utafanyika Uwanja wa Uhuru, Dar es Salaam ambako utasimamiwa na Tito Haule wa Morogoro na kuchezeshwa na Mwamuzi Hans Mabena wa Tanga. Mabena atasaidiwa na Omari Kambangwa wa Dar es Salaam na Khalfan Sika wa Pwani wakati Mbaraka Rashid wa Dar es Salaam atakuwa Mwamuzi wa Akiba – mezani.

Baada ya kulala Mbeya mbele ya Tanzania Prisons kwenye Uwanja wa Sokoine, Majimaji ya Songea itakuwa mwenyeji wa Azam FC ya Dar es Salaam ambayo juma lililopita iliambulia sare tasa kutoka kwa African Lyon. Majimaji na Azam zinakutana kwenye mchezo Na. 134 utakaofanyika Uwanja wa Majimaji mjini Songea.

Katika mchezo huo ambao Mwamuzi atakuwa Ngole Mwangole wa Mbeya ambaye ni mwamuzi bora wa Ligi Kuu ya Vodacom msimu uliopita, atasaidiwa na Mirambo Tshikungu na Mashaka Mwandembwa – pia wote wa Mbeya huku kamishna akiwa ni David Lugenge wa Iringa.

Mwadui ambayo ilianza vibaya duru la pili kwa kupoteza mchezo uliopita, Jumamosi Desemba 24, mwaka huu itakuwa mwenyeji wa Mbao FC ya Mwanza kwenye Uwanja wa Mwadui Complex mkoani Shinyanga. Mchezo huo Na. 135, utasimamiwa na Kamishna Staricko Nyikwa wa Singida katika mchezo utakaoanza saa 8.00 mchana ili kutoa fursa kwa mdhamini Azam kuonesha mchezo huo moja kwa moja ikiwa na maana ya mubashara.

Waamuzi wataongozwa na  Emmanuel Mwandembwa atakayesimama katikati kupuliza filimbi huku akisaidiwa na Abdallah Uhako na Agnes Pantaleo wote wa Arusha na mezani anatarajiwa kuwa Ezekiel Mboi wa Shinyanga.

Krismas, yaani Desemba 25, 2016 hakutakuwa na mchezo ila siku inayofuata Desemba 26, mwaka huu Ruvu Shooting itakuwa mwenyeji wa Tanzania Prisons ya Mbeya kwenye Uwanja wa Mabatini, ulioko Mlandizi mkoani Pwani katika mchezo Na 136.

Manyama Bwire wa Dar es Salaam atakuwa Kamishna wa mchezo huo wakati Mwamuzi ni Forentina Zabron wa Dodoma akisaidiwa na Hassan Zani wa Arusha na Silvester Mwanga wa Kilimanjaro. Mwamuzi wa akiba - Mezani atakuwa Andrew Shamba wa Pwani.

Desemba 28, mwaka huu kutakuwa na mechi mbili ambako Young Africans ya Dar es Salaam itakuwa mwenyeji wa Ndanda ya Mtwara kwenye Uwanja wa Uhuru jijini katika mchezo Na. 137 ambako Juma Chiponda wa Tanga atakuwa kamishna wa mchezo huo.

Mwamuzi wa kati katika mchezo huo atakuwa Eric Onoca wa Arusha akisaidiwa na Michael Mkongwa wa Njombe na Janeth Balama wa Iringa. Mwamuzi wa akiba atakayekaa mezani atakuwa Mwanahamisi Matiku wa Dar es Salaam.

Kadhalika siku hiyo, Majimaji ya Songea itakuwa mgeni wa Mtibwa Sugar ya Morogoro kwenye Uwanja wa Manungu ulioko Mvomero katika mchezo Na. 138 utakaosimamiwa na Kamishna Pius Mashera wa Dodoma, utachezeshwa na Mathew Akrama kutoka Mwanza akisaidiwa na Abdallah Rashid wa Pwani na Gasper Ketto wa Arusha. Mwamuzi wa akiba atakuwa Selemani Kinugani.

Kadhalika Desemba 29, mwaka huu kutakuwa na mechi mbili. Ruvu Shooting ya Pwani inatarajiwa kuwa mwenyeji wa Simba ya Dar es Salaam kwenye Uwanja wa Uhuru Dar es Salaam katika mchezo ambao mwamuzi atakuwa Alex Mahagi wa Mwanza.

Katika mchezo huo Na. 139, Mahagi atasaidiwa na Ferdinand Chacha pia wa Mwanza na Rashid Zongo wa Iringa huku mwamuzi wa akiba akiwa ni Hellen Mduma wa Dar es Salaam. Kamishna wa mchezo atakuwa Peter Temu wa Arusha.

Azam ya Dar es Salaam itatulia nyumbani Uwanja wa Azam huko Chamazi ikicheza na Tanzania Prisons ya Mbeya katika mchezo Na. 140 utakaosimamiwa na Elizabeth Kalinga wa Mbeya huku Mwamuzi akiwa ni Jimmy Fanuel wa Shinyanga huku wasaidizi wake wakiwa ni Makame Mdog pia wa Shinyanga na Abdallah Mkomwa wa Pwani huku Kassim Mpinga akiwa ni mwamuzi wa akiba.

Saa kadhaa kabla ya kuingia mwaka 2017, yaani Desemba 31, mwaka huu kutakuwa na michezo miwili ambako Mwadui ya Shinyanga itacheza na Kagera Sugar ya Kagera kwenye Uwanja wa Mwadui mkoani Shinyanga katika mchezo Na.  141.

Kamishna anatarajiwa kuwa Nassib Mabrouk wa Mwanza na Mwamuzi ni Isihaka Mwalile na wasaidizi wake ni Hellen Mduma na Omary Kambangwa – wote kutoka Dar es Salaam. Julius Kasitu wa Shinyanga anatarajiwa kuwa Mwamuzi wa Akiba.

Kadhalika siku ya funga mwaka, Mbeya City inatarajiwa kucheza na Mbao FC kwenye Uwanja wa Sokoine jijini Mbeya katika Mchezo Na. 143 ambao msimamizi wa mchezo atakuwa Joseph Mapunda wa Ruvuma.

Mwamuzi katika mechi hiyo anatarajiwa kuwa Hussein Athuman wa Katavi wakati wasaidizi wake watakuwa ni Lulu Mushi wa Dar es Salaam na Nicholaus Makaranga wa Morogoro. Mwamuzi wa Akiba Mezani atakuwa Mashaka Mwandembwa wa Mbeya.

Januari mosi kutakuwa na michezo miwili tu ya kukaribisha Mwaka Mpya ambako Toto African ya Mwanza itacheza na Stand United ya Shinyanga kwenye Uwanja wa CCM Kirumba katika mchezo Na. 144 utakaosimamiwa na Jovin Bagenda wa Kagera. Mwamuzi atakuwa Israel Nkongo sambamba na wasaidizi wake Soud Lila na Frank Komba, wote wa Dar es Salaam. Mwamuzi wa akiba mezani atakuwa Mathew Akrama wa Mwanza.

Pia African Lyon ya Dar es Salaam itakuwa mwenyeji wa JKT Ruvu katika mchezo Na. 142 utakaofanyika Uwanja wa Uhuru, Dar es Salaam. Kamishna atakuwa Hamisi Kitila wa Singida wakati Mwamuzi anatarajiwa kuwa Selemani Kinugani wa Morogoro wakati wasaidizi wake ni Omary Juma wa Dodoma na Agnes Pantaleo wa Arusha wakati mezani atakuwa Shafii Mohammed wa Dar es Salaam.

Mara baada ya michezo hiyo, Ligi Kuu ya Vodacom itasimama kwa wiki mbili kupisha michuano ya Kombe la Mapinduzi inayotarajiwa kuanza Januari mosi, mwaka huu.

IMETOLEWA NA TFF